Historiania Enriketa Papa ka reaguar mbi debatin për datën e lindjes së Skënderbeut, duke e cilësuar atë si një “traditë të shpikur” që lidhet me mënyrën si shtetet moderne ndërtojnë kujtesën kombëtare. Sipas saj, data e lindjes së heroit kombëtar nuk njihet dhe kremtimi i saj u hamendësua fillimisht nga Fan Noli, më pas u përvetësua edhe nga regjimi i Enver Hoxhës, në kuadër të idesë se “heronjtë duhet të kenë ditëlindje, jo vetëm ditë vdekjeje”.
Në analizën e saj, Papa thekson se shoqëritë moderne përdorin mite, rituale dhe kremtime publike për të krijuar kohezion social dhe identitet kombëtar, përmes asaj që ajo e quan “kujtesë kulturore”.
Ajo shkruan:
“E gjithë euforia për të kremtuar ‘me pahir’ një datë të shpikur për Skënderbeun, e hamendësuar fillimisht nga Fan Noli, me idenë që figura e tij të mos lidhej vetëm me datën e vdekjes, qasje që u përvetësua më vonë edhe nga Enver Hoxha, dhe të tjerë (heronjtë, sipas këtij koncepti, duhet të kenë ditëlindje, jo ditë vdekjeje), lidhet me ngurtësimin në kujtesën kolektive të ‘traditave të shpikura’, të cilat synojnë të krijojnë kohezion social.
Njihet data e vdekjes së Skënderbeut, por jo ajo e lindjes. Në procesin e formimit të shtetit në epokën moderne, shoqëritë priren të fiksojnë edhe identitetin e tyre kombëtar. Në këtë drejtim ndihmon edhe ‘kujtesa kulturore’, e cila, përmes narrativave publike e zyrtare, miteve, imazheve, ritualeve dhe kremtimeve, mbështetet në nevojën e shoqërisë dhe të elitave për të ndërtuar identitetin, pikërisht përmes injektimit dhe institucionalizimit të kësaj kujtese.”
