Shqipëria po bëhet gjithnjë e më atraktive për fuqinë punëtore të huaj, me synimin për të zëvendësuar mungesat në tregun lokal. Sipas të dhënave të Agjencisë Kombëtare të Punësimit dhe Aftësive, gjatë vitit të kaluar u pajisën me leje pune gati 13 mijë shtetas të huaj, shifër kjo dukshëm më e lartë se vitet e mëparshme.
Më së shumti, punonjësit e huaj janë të angazhuar në sektorin e turizmit, ndërsa një pjesë e tyre janë deklaruar për herë të parë për shkak të shqetësimeve nga kontrollet, sipas ekspertes së tregut të punës, Ergesta Stërmasi.
Të dhënat tregojnë se punonjësit e huaj që kanë mbërritur kryesisht janë nga Turqia, Egjipti, Filipinet, India, Kina dhe Ukraina. Megjithatë, Stërmasi thekson se kjo është një zgjidhje afatshkurtër dhe ka kosto të konsiderueshme, duke shtuar se fokusimi duhet të jetë te përgatitja e të rinjve vendas.
Sipas saj, sjellja e një punonjësi të huaj në Shqipëri kushton deri në 3,500 euro, duke përfshirë shpenzimet për transportin, procedurat ligjore dhe akomodimin.
Përveç punësimit, vitet e fundit është rritur edhe kërkesa për leje qëndrimi, me 13,176 kërkesa të paraqitura gjatë vitit të kaluar, kryesisht nga italianë, indianë, turq dhe qytetarë nga Kosova, sipas Ministrisë së Brendshme.
