Policia e Durrësit ka nisur hetim penal ndaj një 33-vjeçareje, e dyshuar për keqtrajtim dhe braktisje të tre fëmijëve të saj të mitur, të cilët u gjetën në gjendje të mjerueshme.
Sipas Drejtorisë Vendore të Policisë Durrës, specialistët për Hetimin e Krimeve të Stacionit të Policisë Plazh referuan materialet në Prokurori dhe nisën procedimin penal ndaj shtetases B. B., 33 vjeçe, për veprën penale “Keqtrajtimi i të miturve”.
Hetimi nisi pasi rreth orës 17:20, shtetasja D. V. u paraqit në polici dhe deklaroi se ish-nusja e djalit të saj kishte lënë vetëm tre fëmijët e mitur në pallatin ku banonte, rast që ishte publikuar edhe në rrjete sociale.
Shërbimet e Policisë, në bashkëpunim me Zyrën e Mbrojtjes së Fëmijëve, ndërhynë menjëherë duke marrë në mbrojtje të miturit. Ata u dërguan fillimisht në spital për ekzaminime mjekësore dhe më pas u sistemuan në kujdesin e Qendrës së Mbrojtjes së Fëmijëve në Durrës.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme ligjore.
