Reshjet intensive të ditëve të fundit kanë shkaktuar përmbytje të mëdha në zonat e Dimalit dhe Bilishtit, duke përkeqësuar ndjeshëm situatën në disa komunitete. Ujërat kanë vërshuar në rrugë, banesa dhe toka bujqësore, ndërsa autoritetet po punojnë pa ndërprerje për menaxhimin e emergjencës.
Ndërkohë, në fshatin Progër të bashkisë Devoll raportohet për një person të humbur. Djali i zonjës F.H., 76 vjeçe, ka njoftuar se nëna e tij ka dalë nga banesa në orët e mëngjesit dhe nuk është kthyer më. Autoritetet dyshojnë se zhdukja mund të jetë e lidhur me kushtet e vështira atmosferike dhe niveli e lartë të ujërave në zonë.
Për kërkimin e të moshuarës janë angazhuar forcat e Repartit Ushtarak 1033 në Drenovë, si dhe efektivë të DVP Korçë, të cilët po zhvillojnë operacione intensive në terren. Kërkimet vijojnë, por reshjet e vazhdueshme dhe terreni i përmbytur po e vështirësojnë ndjeshëm aksionin.
