Avokati dhe aktivisti i njohur, Genti Serjani, ka denoncuar publikisht bllokimin e mjeteve elektrike, monopatinave nga Policia e Shtetit, duke e cilësuar këtë veprim si tërësisht të paligjshëm dhe arbitrar.
Sipas Serjanit, bllokimi i monopatinave është kryer pa pasur një bazë ligjore në fuqi, duke cënuar të drejtat e qytetarëve dhe duke shkelur rendin juridik.
> “Prej ditës së parë kemi thënë se bllokimi i mjeteve elektrike ishte i paligjshëm. Tani kemi edhe faktet që e provojnë qartësisht këtë”, shkruan Serjani në një postim në Facebook, duke publikuar edhe dokumentet përkatëse.
Ai sjell në vëmendje të dhëna konkrete për mënyrën si është vepruar nga institucionet:
Udhëzimi i Ministres për ndalimin dhe bllokimin e mjeteve elektrike është miratuar më 13 tetor 2025, pikërisht në të njëjtën ditë kur në terren po realizohej bllokimi nga policia; Ky udhëzim është botuar në Fletoren Zyrtare më 17 tetor 2025, pra vetëm atëherë ka hyrë në fuqi ligjërisht;
Në përmbajtje, vetë udhëzimi i ngarkon Policisë së Shtetit detyrën për ta zbatuar, por kjo mund të ndodhë vetëm pas hyrjes në fuqi të tij.
Ndërkohë, sipas Serjanit, urdhri për bllokimin e mjeteve nga ana e Drejtorit të Policisë së Shtetit është dhënë më 9 tetor 2025, pra katër ditë para se të miratohej udhëzimi dhe plot tetë ditë përpara se të publikohej zyrtarisht.
> “Pra, kemi një rast të pastër ku Policia e Shtetit ka ‘zbatuar’ një akt që nuk ekzistonte ligjërisht. Ky është një abuzim institucional dhe një shkelje flagrante e shtetit ligjor”, evidenton Serjani.
Avokati kërkon që të gjitha rastet e bllokimeve të bëra në këto kushte të shpallen të pavlefshme, dhe të mbahet përgjegjësi për tejkalimin e kompetencave nga ana e institucioneve shtetërore.
