Prindërit e një adoleshenti 16-vjeçar nga Kalifornia kanë ngritur padi kundër kompanisë OpenAI dhe shefit ekzekutiv të saj, Sam Altman, duke pretenduar se platforma ChatGPT e ka nxitur djalin e tyre drejt vetëvrasjes.
Në padinë e paraqitur të hënën në një gjykatë të Kalifornisë, Matthew dhe Maria Raine pretendojnë se ChatGPT ka zhvilluar një marrëdhënie të ngushtë me djalin e tyre, Adam, gjatë viteve 2024–2025. Sipas tyre, në bisedën e fundit më 11 prill 2025, sistemi i ka dhënë udhëzime për vjedhjen e alkoolit dhe për mënyrën e përdorimit të një laku, duke e konfirmuar se “mund të mbante një njeri të varur”.
Adoleshenti u gjet i pajetë disa orë më vonë, duke përdorur të njëjtën metodë të përshkruar në bisedë. Në dosjen gjyqësore përfshihen gjithashtu mesazhe ku ChatGPT thuhet se i kishte thënë: “Nuk i detyrohesh askujt të mbijetosh” dhe madje e kishte ndihmuar të shkruante një letër lamtumire.
Familja Raine kërkon dëmshpërblim financiar dhe masa sigurie të reja, duke përfshirë ndërprerjen automatike të çdo bisede që përfshin vetëdëmtim dhe aktivizimin e kontrolleve prindërore për përdoruesit e mitur. Pas publikimit të rastit, organizata jofitimprurëse Common Sense Media reagoi duke e cilësuar tragjedinë si një paralajmërim serioz. “Përdorimi i inteligjencës artificiale për shoqëri dhe këshillim emocional tek adoleshentët paraqet një rrezik të papranueshëm,” thuhet në reagim.
