Rikonstruksioni i godinës së Kryeministrisë jo vetëm po u kushton miliona euro shqiptarëve, por edhe tenderët e zhvilluar për këtë qëllim po shoqërohen me skualifikime të ofertave më të favorshme ekonomike. Pas projektit të ashtuquajtur “Kopshti Eden”, që kapi vlerën e rreth 4.3 miliardë lekëve, tashmë pritet të shpenzohen edhe 534 milionë lekë për punime në bodrumin e Kryeministrisë, ku përfshihen forcimi i strukturës së godinës, ndërtimi i një depoje uji si dhe rikonstruksioni i arkivës me pajisje të reja.
Tenderi është shpallur nga Fondi Shqiptar i Zhvillimit, i cili kishte përcaktuar një fond limit prej 712 milionë lekësh. Në garë morën pjesë 15 kompani, ndërsa 7 prej tyre u skualifikuan. Në fund, fituese u shpall kompania Senka sh.p.k..
Por ajo që ngre pikëpyetje është fakti se kompania fituese kishte vetëm ofertën e pestë më të ulët në garë. Katër operatorë ekonomikë kishin paraqitur oferta më të favorshme financiare, por u lanë jashtë procedurës.
Dy prej kompanive të skualifikuara, AGI KONS dhe INA, kishin ofertuar respektivisht rreth 60 milionë dhe 42 milionë lekë më pak se kompania fituese. Sipas argumentimit të FSHZH-së, të dyja ofertat u konsideruan “anomalisht të ulëta”, pasi rezultonin nën nivelin mesatar të ofertave të vlefshme dhe, sipas komisionit, nuk përputheshin me vlerat normale të tregut.
Megjithatë, edhe duke marrë të mirëqenë arsyetimin për skualifikimin e këtyre operatorëve, FSHZH duket se ka anashkaluar sërish renditjen ekonomike të ofertave. Institucioni nuk zgjodhi as ofertën e kompanisë RSM COMPANY, e cila renditej e treta për nga vlera dhe kishte ofertuar rreth 38 milionë lekë më pak se kompania fituese.
Çfarë e shtyu FSHZH-në që, mes ofertave të konsideruara të vlefshme dhe të paskualifikuara, të përzgjidhte kompaninë që kishte paraqitur një kosto dukshëm më të lartë?
Mesa duket, problemet e mëhershme me drejtësinë nuk përbëjnë arsye për të ngritur dyshime në dhënien e kontratave publike. Të paktën kjo përshtypje krijohet në rastin e Senka sh.p.k., e cila duket se vazhdon të gëzojë besimin e drejtuesit të Fondi Shqiptar i Zhvillimit, Dritan Agolli, pavarësisht se një prej aksionereve të saj u dënua vetëm një vit më parë nga GJKKO për falsifikim dokumentesh dhe shkelje të barazisë në tendera.
Në qershor të vitit të kaluar, Gjykata e Posaçme Kundër Korrupsionit dhe Krimit të Organizuar shpalli fajtorë dy zyrtarë të Bashkisë Kurbin, si edhe aksioneren e kompanisë “Senka”, Donika Senka, në lidhje me procedurat e tenderimit për ujësjellësin e Laçit.
Donika Senka, e cila zotëron 50% të aksioneve të kompanisë, u deklarua fajtore për veprën penale të falsifikimit të vulave dhe stampave dhe u dënua me 8 muaj burgim, dënim që më pas iu konvertua në shërbim prove.
