Njësia Policore Detare dhe Policia Kufitare kanë intensifikuar kontrollet gjatë kësaj jave në vijën bregdetare nga Komani në Ksamil, për të rritur sigurinë në ujërat territoriale dhe për të shmangur rreziqet për pushuesit. Si rezultat, janë kontrolluar 525 mjete lundruese, nga të cilat 35 janë bllokuar për shkelje të ndryshme të rregullave të qarkullimit detar.
Ndër mjetet e bllokuara rezultojnë:
22 jet ski
5 skafe
6 gomone
2 varka metalike me motor uji të instaluar
Nga këto, 14 mjete u konstatuan duke lundruar brenda perimetrit të sigurisë, duke rrezikuar drejtpërdrejt jetën e pushuesve. Drejtuesit e tyre janë ndëshkuar me gjobë administrative prej 100.000 lekësh secili.
Gjithashtu, falë ndërhyrjes së shpejtë të forcave policore, janë shpëtuar në det 19 persona, mes tyre shtetas shqiptarë dhe të huaj, si dhe janë nxjerrë në breg 6 mjete të rrezikuara.
Në një tjetër aksion, Policia Kufitare e Sarandës në bashkëpunim me autoritetet greke ka lokalizuar dhe bllokuar një gomone të vjedhur në zonën e Lefkadhës (Greqi), e cila po lundronte jashtë perimetrit të sigurisë në plazhin e Pemës së Thatë, Ksamil-Sarandë. Vijon puna për identifikimin e autorëve.
