Ndërsa 56 studentë të Akademisë së Sigurisë përfunduan në spital me simptoma helmimi pas konsumimit të drekës, debati publik mbrëmjen e së enjtes mori një kthesë disi surrealiste: jo te ushqimi, jo te higjiena, por te uthulla.
Në një dalje në emisionin “Opinion”, drejtoresha e Autoritetit Kombëtar të Ushqimit, Blerina Gjylameti, u përpoq të qetësonte opinionin publik duke sqaruar se pamjet e qarkulluara në rrjet, ku pretendohej se në shishet e uthullës kishte krimba, nuk ishin të vërteta.
Madje, sipas saj, kjo është pothuajse biologjikisht e pamundur.
“Për shkak të aciditetit uthulla nuk mund ta ketë atë gjë”, deklaroi Gjylameti, duke shtuar se nuk ishte gjetur asnjë mostër e tillë dhe se edhe administrata e Akademisë kishte mohuar ekzistencën e uthullës së famshme me krimba.
Kështu, ndërsa studentët kaluan natën në spitale me të vjella dhe probleme gastrointestinale, publiku mori më në fund një siguri të rëndësishme institucionale: uthulla rezulton e pafajshme.
Për pjesën tjetër të historisë, vendi duhet të presë edhe 10 ditë.
Sipas AKU-së, analizat laboratorike të ushqimit dhe ujit të pijshëm janë ende në proces, ndërsa institucionet po verifikojnë kushtet higjieno-sanitare të kompanisë së kateringut që furnizonte Akademinë e Sigurisë.
Në këtë mënyrë, një nga episodet më serioze të helmimit masiv në një institucion shtetëror po trajtohet mes analizave laboratorike, deklaratave për “maturi” dhe një sqarimi kombëtar mbi vetitë kimike të uthullës.
