Ekipet e punës kanë përfunduar evidentimin e dëmeve të shkaktuara nga zjarri i datës 11 gusht, i cili preku njësinë administrative Skënderbegas në bashkinë e Gramshit. Sipas të dhënave zyrtare, 68 banesa janë djegur, prej të cilave:
10 banesa janë shkatërruar totalisht dhe për to kërkohet rindërtim i plotë, 16 banesa kërkojnë rikonstruksion të pjesshëm, 42 banesa të tjera të dëmtuara kanë qenë shtëpi sezonale ose të pabanueshme.
Në këto statistika përfshihen gjithashtu pajisjet elektroshtëpiake dhe mobiljet e banorëve të prekur nga zjarri.
Zjarret kanë shkaktuar gjithashtu humbjen e një pjese të konsiderueshme të bagëtive: 215 bagëti të imta, 9 gjedh dhe 7 njëthundrakë kanë ngordhur për shkak të flakëve dhe tymit.
Sa i përket pasurive bujqësore, zjarri ka shkrumbuar:
44.045 hektarë ullinj, 11.028 hektarë rrush, 1.451 hektarë bimë medicinale, 9,5 hektarë pemë frutore dhe arrorë.
Përsa i përket sipërfaqeve pyjore, ende nuk ka të dhëna të konfirmuara, pasi pjesa më e madhe e pyllit e prekur është pyll me pisha dhe do të verifikohet nëpërmjet pamjeve satelitore. Pas përfundimit të evidentimit të dëmeve, faza e dytë e këtij procesi do të përfshijë përllogaritjen financiare të humbjeve.
