Gjatë tremujorit të dytë të vitit 2025, bashkitë në të gjithë vendin kanë miratuar 352 leje ndërtimi, një shifër e njëjtë me atë të së njëjtës periudhë të vitit të kaluar (prill-qershor 2024). Megjithatë, ndryshimi i dukshëm këtë vit lidhet me sipërfaqen e ndërtimit: nga 845 mijë metra katrorë vitin e kaluar, në vetëm 280 mijë metra katrorë këtë vit, një rënie me rreth 70%.
Pjesa dërrmuese e lejeve i përket ndërtimit të banesave një ose dykatëshe, ndërkohë që janë miratuar edhe 4 leje për rezidenca, 9 për hotele dhe 21 për ndërtesa tregtare.
Qarku i Durrësit mban vendin e parë me 156 leje ndërtimi, duke përbërë pothuajse gjysmën e totalit kombëtar. Përveç tij, një rritje e interesit për ndërtim është evidentuar edhe në Korçë dhe Shkodër – dy qytete që po shihen gjithnjë e më shumë si destinacione me potencial të lartë turistik.
Sipas të dhënave të publikuara nga INSTAT, vlera e përgjithshme e investimeve ndërtimore të miratuara për këtë periudhë kap shifrën e 20 miliardë lekëve.
