Banorët e disa fshatrave të zonës së Kolonjës kanë dalë sot në protestë në Qafzez, pranë urës së Baba Selimit, e cila ndodhet mbi lumin Osum. Tubimi vjen pas izolimit të mbi 10 fshatrave, që prej një jave po përballen me pasojat e reshjeve të rrëmbyeshme dhe përmbytjeve që kanë dëmtuar rëndë infrastrukturën.
Ura lidhëse, e vetmja rrugë hyrëse dhe dalëse e zonës, është dëmtuar rëndë, duke e bërë të pamundur kalimin e automjeteve dhe mjeteve të emergjencës. Si pasojë, banorët thonë se në disa prej fshatrave të thellë ndodhen persona të sëmurë që presin ndihmë, ndërsa ndërhyrja ka qenë e pamundur për shkak të bllokimit të plotë të rrugës.
“Kemi të sëmurë që po presin në mëshirë të fatit”, shprehen protestuesit.
Banorët u bëjnë thirrje institucioneve që të ndërhyjnë urgjentisht dhe të rikthejnë kalueshmërinë e urës, pasi dëmtimet e rënda e kanë shkëputur zonën nga rruga kryesore dhe e kanë lënë komunitetin në izolim të plotë.
