Banorët e Rrjollit në Velipojë kanë zhvendosur sot protestën e tyre para zyrave të Prokurorisë së Posaçme (SPAK), duke kundërshtuar ndërtimin e një resorti në pronat që ata pretendojnë se u përkasin me dokumentacion të rregullt.
Në shenjë revolte, disa prej protestuesve kanë hedhur vezë në drejtim të godinës së SPAK, ndërsa kanë bërë thirrje për drejtësi dhe ndërhyrje të institucioneve shtetërore.
Protesta vjen pas disa ditësh kundërshtimesh në zonën ku po zhvillohet projekti i resortit. Më herët, banorët janë përplasur me policinë dhe kanë pasur konflikte edhe me përfaqësues të palëve private që pretendojnë pronësinë mbi tokën ku po ndërtohet.
Banorët kërkojnë ndërprerjen e punimeve dhe zgjidhjen e çështjes sipas ligjit, duke i bërë thirrje SPAK dhe institucioneve përgjegjëse që të hetojnë situatën dhe të ndërhyjnë për të sqaruar pronësinë mbi tokën.
