Banorët e Durrësit zhvilluan këtë të premte një protestë përpara Kryeministrisë, kundër projektit TID (Transformimi i Integruar i Durrësit), duke kërkuar ndërhyrjen e qeverisë dhe rishikimin e vendimit që parashikon shembjen e banesave të tyre në zonën pranë amfiteatrit.
"Stop vjedhjes” dhe “Stop projektit TID” ishin disa prej pankartave që mbanin në duar protestuesit, të cilët akuzojnë autoritetet për shkelje të të drejtës së pronësisë dhe mungesë transparence. Ata deklaruan se do të vijojnë protestat deri në anulimin e projektit në formën aktuale.
Sipas banorëve, 74 familje janë njoftuar papritur se shtëpitë e tyre do të shemben për t’i lënë vend një lulishteje publike, pa u konsultuar më parë dhe pa marrë pëlqimin e tyre. Ata pretendojnë gjithashtu se procesi i shpronësimit po kryhet me çmime reference që nuk pasqyrojnë vlerën reale të pronave.
Banorët kanë ndjekur edhe rrugën ligjore për të kundërshtuar projektin, ndërsa në mbështetje të tyre qytetarë të ndryshëm kanë firmosur një peticion kundër shpronësimeve, duke i cilësuar ato si të padrejta dhe abuzive.
