Një aksident i rëndë ka ndodhur në autostradën A8 pranë kryqëzimit të Irschenbergut në Gjermani, ku janë përfshirë një autobus me pasagjerë nga Kosova dhe një kamion. Ngjarja ka ndodhur pak pas mesnatës, ndërsa raportohet se 30 nga 41 pasagjerët e autobusit kanë mbetur të plagosur.
Mediat gjermane bëjnë me dije se dy prej të plagosurve janë në gjendje të rëndë. Hetimet për shkaqet e aksidentit kanë nisur menjëherë. Autobusi është përplasur me kamionin, i cili drejtohej nga një shtetas polak.
Sipas policisë, autobusi ka tentuar të shmangë përplasjen duke devijuar majtas, por nuk ka mundur të ndalojë në kohë. Nuk ka të dhëna për ndonjë defekt teknik në asnjërin nga mjetet. Fotot nga vendi i ngjarjes tregojnë se autobusi ka marrë dëmtime të konsiderueshme në pjesën e përparme, ndërsa kamioni ka pësuar dëmtime në pjesën e pasme, pa u lënduar shoferi.
