Autoriteti Kombëtar i Ushqimit (AKU) ka njoftuar tërheqjen nga tregu të një serie qumështi për bebe “Aptamil 1 Pronutra”, pas një sinjalizimi nga Sistemi i Alarmit të Shpejtë për Ushqimin dhe Ushqimin për Kafshë. Sipas AKU-së, gjatë kontrolleve zyrtare të kryera është konstatuar prania e cereulide, një toksinë e prodhuar nga bakteri Bacillus cereus, në formulën e qumështit për foshnje.
Produkti i prekur është:
Emri i produktit: Aptamil 1 Pronutra 800g Advanced
Numri i artikullit: 172911
Data e skadencës: 10/11/2026
AKU bën me dije se trupat inspektuese janë angazhuar menjëherë në terren për verifikimin e rastit dhe për tërheqjen e produktit nga tregu, në përputhje me procedurat ligjore në fuqi. Autoriteti u bën thirrje konsumatorëve që disponojnë këtë qumësht bebesh të mos e përdorin dhe ta kthejnë në pikat e shitjes ku është blerë.
