Në Shqipëri, shumica e personave të prekur me HIV diagnostikohen vonë, duke u kthyer jo vetëm në rrezik për transmetimin e virusit te të tjerët, por edhe për jetën e tyre. Vendin tonë e rendisin ndër shtetet e Evropës me përqindjen më të lartë të diagnozave të vona.
Sipas të dhënave zyrtare, 66.7% e rasteve të personave me HIV në Shqipëri zbulohen në faza të avancuara, kur trajtimi është më i vështirë dhe prognoza më e rënduar. Ky fenomen, sipas mjekëve, tregon mungesë testimesh, stigmë dhe informim të pamjaftueshëm.
Numri i të prekurve ka ardhur në rritje të lehtë vitet e fundit. Vetëm gjatë këtij viti janë regjistruar 125 raste të reja, ndërsa në rang vendi rezultojnë afro 2 mijë persona që jetojnë me HIV.
Specialistët theksojnë se diagnostikimi i hershëm është kyç për të penguar përhapjen dhe për të garantuar mbijetesë afatgjatë, duke bërë thirrje për më shumë testime, fushata ndërgjegjësimi dhe trajtim të aksesueshëm pa stigma.
