Një 42-vjeçar i identifikuar si Ilir Kurti ka humbur kontaktet me familjen e tij në Skrapar dhe dyshimet janë se ai është hedhur në kanionet e lumit Osum.
Alarmi për largimin e tij nga banesa u ngrit nga familja dhe pas shumë kërkimesh, policia ka gjetur motorin afër kanioneve. Në një distancë më të largët nga mjeti motorik është gjetur celulari i Kurtit dhe një shishe verë gjysmë e konsumuar.
Polumbarët kanë nisur kërkimet, pasi dyshimet janë të forta se ai është vetëhedhur. Kurti kishte jetuar jashtë vendit për disa kohë dhe aktualisht jetonte me nënën e tij në Skrapar.
“Informacion paraprak/
Dje, kallëzuan familjarët e shtetasit I. K., 42 vjeç, banues në Skrapar, se ai ishte larguar nga banesa. Shërbimet e Policisë nisën menjëherë kërkimet dhe gjatë kërkimeve gjetën pranë kanioneve të lumit Osum, konkretisht në vendin e quajtur ‘Ura e Blezënkës’, motomjetin dhe sendet personale të 42-vjeçarit. Paraprakisht dyshohet se ky shtetas mund të jetë hedhur në lumë. Vijojnë kërkimet për gjetjen e këtij shtetasi, si dhe vijojnë hetimet për të dokumentuar rrethanat e rastit”, thuhet në njoftimin e policisë.
