Shqiptarët vazhdojnë të kryesojnë në rajon për frikën se nuk mund të sigurojnë ushqim aq sa u nevojitet. Raporti “Gjendja e Sigurisë Ushqimore dhe Ushqyerjes në Botë”, i hartuar nga pesë agjenci të specializuara të Kombeve të Bashkuara, ka nxjerrë në pah se 33% e shqiptarëve përjetojnë pasiguri ushqimore një shifër shumë më e lartë se në të gjitha vendet e Ballkanit, të cilat variojnë nga 6,6% deri në 15%.
Shqipëria ka një përqindje të lartë të qytetarëve që ndihen të pasigurt edhe krahasuar me mesataren globale, e cila është 28%.
Pasiguria ushqimore, sipas ekspertëve që kanë hartuar raportin, ka shënuar një rënie të lehtë në nivel global.
Nga ana tjetër, raporti ka nxjerrë në pah se rreth 8,2% e popullsisë globale ose rreth 673 milionë njerëz përjetuan uri në vitin 2024, duke shënuar një ulje në krahasim me vitin 2023.
Edhe pse kjo rënie është pozitive, vlerësimet e fundit mbeten ende mbi nivelet para pandemisë, pasi inflacioni i lartë i ushqimeve në vitet e fundit ka ndikuar në një rikuperim të ngadaltë të sigurisë ushqimore./euronews albania/
