Një grua ka hipur në një nga kullat e puseve të naftës në Kuçovë, duke kërcënuar se do të hidhet.
Elona Bregaj, sipas informacioneve paraprake, ka qenë punonjëse e ndërmarrjes së pastrimit. Dyshohet se shkak për situatën ka qenë largimi i saj nga puna, ndërsa burime bëjnë me dije se nuk është hera e parë që ajo ndërmerr një akt të tillë.
Pas largimit nga puna dhe problemeve që lidhen me pagesat, gruaja hipi në një nga kullat e puseve të naftës, duke kërcënuar se do të hidhej.
“Më hoqën nga puna sepse kërkova rrogat. Kishim 2 muaj e gjysmë pa i marrë. Nuk e di si do zgjidhet ky problem, ja të shkojmë te kryetari i bashkisë, të mos përsëritet më”, është shprehur ajo.
Ndërkohë, koleget e saj të punës, të cilat gjithashtu janë pushuar, kanë treguar se pak ditë më parë kishin shkuar në Bashkinë e Kuçovës për të kërkuar pagesat e prapambetura, por më pas janë larguar nga puna.
