Në Itali, një grua 102-vjeçare u ngrit në këmbë vetëm dy ditë pasi iu nënshtrua një operacioni të komplikuar në legen pas një frakture të femurit.
Ndodhi në Policlinico Tor Vergata në Romë, ku një ekip multidisiplinar ortopedësh, specialistësh të osteoporozës dhe rehabilitimit realizoi me sukses ndërhyrjen, pavarësisht moshës dhe gjendjes delikate të pacientes.
Mjekët italianë shpjegojnë se suksesi nuk lidhet vetëm me operacionin, por me gjithë zinxhirin e kujdesit: diagnostikim të fragjilitetit kockor, trajtim të personalizuar, rehabilitim të menjëhershëm dhe terapi për të parandaluar fraktura të tjera.
Pra një sistem që nuk e sheh një të moshuar si barrë apo statistikë, por si pacient që duhet të rikthehet në jetë normale edhe në moshën 102-vjeçare.
Ndërkohë në Shqipëri, Ministria e Shëndetësisë vazhdon të prodhojë video propagandistike për të shpjeguar se çfarë do të thotë “kujdes për të moshuarit”.
Sepse këtu kujdesi shpesh komunikohet më shumë me montazhe, slogane dhe postime Facebook-u sesa me standarde reale rehabilitimi, trajtim modern apo spitale që funksionojnë si sistem.
Dallimi mes propagandës dhe shtetit funksional ndonjëherë shihet në detaje të vogla. Në njërin vend, një 102-vjeçare çohet në këmbë pas dy ditësh. Në tjetrin, ende prodhohen video për të bindur njerëzit se kujdesi ekziston.
