Tregu global i vitaminave dhe mineraleve vlen mbi 32.7 miliardë dollarë, ndërsa mbi 74% e amerikanëve dhe dy të tretat e britanikëve pranojnë se i përdorin për të përmirësuar shëndetin. Por studimet tregojnë një tablo të përzier: disa nuk gjejnë përfitime të qarta, ndërsa të tjera paralajmërojnë për rreziqe serioze nga “mbidozimi”, siç është rritja e rrezikut për kancer të mushkërive nga beta-karoteni tek duhanpirësit apo rreziku për hemorragji në tru nga vitamina E në doza të larta.
Megjithatë, ka përjashtime. Vitamina D, e rëndësishme për kockat dhe sistemin imunitar, rekomandohet gjerësisht gjatë muajve të dimrit për ata që jetojnë në zona me pak diell. Studime të mëdha, si prova klinike “Vital”, sugjerojnë se përdorimi afatgjatë i vitaminës D mund të ulë vdekjet nga kanceri dhe të reduktojë sëmundjet autoimune, edhe pse nuk ka treguar përfitime të qarta për parandalimin e frakturave.
Përfundimi i ekspertëve: një dietë e balancuar me fruta, perime, drithëra, peshk dhe arra mbetet burimi më i mirë i mikronutrientëve, ndërsa suplementet duhen përdorur me kujdes dhe vetëm kur ka mungesa të provuara.
