Presidentja e Kosovës, Vjosa Osmani, ka pritur në Prishtinë këngëtaren me famë botërore, Dua Lipa, për t’i dorëzuar shtetësinë e Republikës së Kosovës përmes një dekreti presidencial.
Në një postim në Facebook, Osmani e cilësoi këtë si një “nder të veçantë” për vendin, duke e vlerësuar Lipën si një nga figurat më të rëndësishme artistike dhe kulturore në historinë e Kosovës.
“Mirë se erdhe në shtëpi, Dua”, shkroi Presidentja, duke shtuar se artistja ka qenë dhe mbetet një nga zërat më të fuqishëm në skenën ndërkombëtare, e cila me sukseset e saj ka frymëzuar miliona njerëz në mbarë botën.
Osmani theksoi gjithashtu rolin e Lipës në promovimin e Kosovës në arenën ndërkombëtare, në fuqizimin e të rinjve dhe përkrahjen e artit vendor.
“Kosova është gjithmonë krenare me ty”, përfundon mesazhin e saj Presidentja.
