Studentët në Serbi kanë njoftuar se do të vazhdojnë protestat edhe në mbrëmjen e sotme, pas ngjarjeve të tensionuara gjatë natës së 13 dhe 14 gushtit. Përmes rrjeteve sociale, ata kanë shpërndarë vendndodhjen dhe orarin e tubimeve, duke bërë thirrje për bashkim të qytetarëve në të gjithë vendin.
Në kryeqytetin Beograd, protesta pritet të fillojë në orën 19:30. Më parë, në rreth 30 qytete u zhvilluan protesta masive nën sloganin “Serbi, zgjohu”, me përplasje të ashpra mes protestuesve dhe policisë, kryesisht pranë selive të Partisë Progresive Serbe (SNS) në Beograd dhe Novi Sad.
Për herë të parë, në përplasjet morën pjesë edhe pjesëtarë të Forcave të Armatosura Serbe, përfshirë njësinë elitare “Kobra”. Shtatë efektivë ushtarakë u plagosën, katër prej tyre me dëmtime serioze.
Studentët theksuan se protesta u shkaktua nga dhuna në Vrbas, ku protestuesit u sulmuan nga mbështetës dhe anëtarë të Partisë Progresive Serbe, të armatosur me fishekzjarrë, gurë, shishe me ujë të ngrirë dhe mjete të tjera të rrezikshme.
