Presidentja e Republikës së Kosovës, Vjosa Osmani, ka mandatuar zyrtarisht Glauk Konjufcën për të tentuar formimin e Qeverisë së re të vendit, pas propozimit që i është bërë nga Lëvizja Vetëvendosje. Ky vendim i presidentes vjen pas një periudhe të tensionuar politike dhe pas konsultimeve me subjektin më të madh parlamentar. Në një konferencë për media të mbajtur pas takimit me përfaqësuesit e Vetëvendosjes, Osmani tha se Kushtetuta e Kosovës nuk kërkon garanci të votave përpara se të jepet mandati, por vlerëson gjasat që kandidati i propozuar të mund të sigurojë shumicën në Kuvend.
"Askund në Kushtetutë nuk kërkohen garanci, kërkohen gjasa, dhe ka dallim të madh mes garancisë dhe gjasave. Garancia jepet në Kuvend, prandaj edhe kërkohen votat aty, ndërsa gjasat ofrohen në zyrën time,” deklaroi Presidentja Osmani.
Ajo bëri të ditur se gjatë takimit me përfaqësuesit e Lëvizjes Vetëvendosje dhe me Glauk Konjufcën, është bindur se ata kanë besim të plotë se mund të sigurojnë mbështetjen e nevojshme për formimin e Qeverisë.
“VV dhe Glauk Konjufca kanë besim të plotë që mund t’i arrijnë votat e nevojshme, por kjo i takon atyre. Mua më takon të bindem që kanë gjasa, dhe ata më kanë bindur se kanë gjasa, ashtu siç kërkohet nga aktgjykimi i Kushtetueses. Sikur mos të kishte fare propozim, do të kishim një situatë krejt tjetër,” theksoi Osmani.
Ky vendim i presidentes hap zyrtarisht rrugën për tentativën e dytë për formimin e Qeverisë së re në Kosovë, pas zhvillimeve të fundit politike që çuan në nevojën për një riformatim të ekzekutivit.
