Qytetarët e Maqedonisë së Veriut pritet të mund të udhëtojnë në Shtetet e Bashkuara të Amerikës vetëm me pasaportë, pa pasur nevojë për aplikim, dokumente shtesë apo intervista për viza.
Kjo është një nga çështjet e ngritura nga Qeveria e Maqedonisë së Veriut në kuadër të Dialogut Strategjik me SHBA, i nisur në qershor të vitit 2022, i cili synon të forcojë raportet mes dy vendeve dhe të sjellë përfitime konkrete në fusha të ndryshme bashkëpunimi.
Sipas Ministrisë së Punëve të Jashtme dhe Tregtisë së Jashtme, institucionet maqedonase janë të angazhuara në grupet ndërsektoriale të punës për t’u bashkuar me Programin për Heqjen e Vizave dhe Programin Global për Hyrje në SHBA. Megjithatë, ky mbetet një proces afatgjatë që zhvillohet brenda kornizës së Dialogut Strategjik.
