Kryetarja e komunës së Preshevës, Ardita Sinani, ka vendosur flamurin shqiptar në objektin e komunës për të festuar Ditën e Pavarësisë, më 28 Nëntor.
Në urimin e saj për këtë ditë të veçantë, Sinani theksoi se shqiptarët në Luginën e Preshevës vazhdojnë të rezistojnë përkundër mohimit të përdorimit zyrtar të flamurit nga autoritetet serbe.
“Edhe përballë diskriminimit të Serbisë dhe mohimit të përdorimit zyrtar të flamurit për shqiptarët e Luginës, ne mbetemi të palëkundur: me rezistencë, me dinjitet dhe me besim të plotë në barazi, demokraci dhe liri. Një flamur, një zemër! Për Preshevën, Luginën, për shqiptarinë, për flamurin që na bashkon. Nga Presheva, Medvegja e Bujanoci, deri te çdo zemër që mban kuq e zinë — Gëzuar Festën e Flamurit dhe të Pavarësisë!”, shkroi Sinani.
Vendosja e flamurit në komunë vjen si një simbol i përpjekjes së komunitetit shqiptar në Luginë për të ruajtur identitetin dhe të drejtat e tyre kulturore dhe kombëtare.
Shqiptarët në Luginën e Preshevës përballen me privime të shumta nga shteti serb, përfshirë kufizime në përdorimin zyrtar të flamurit, pengesa në edukimin në gjuhën shqipe, dhe mungesë të përfaqësimit adekuat në institucionet lokale dhe shtetërore.
