Nënkryetarja e Kuvendit të Kosovës nga radhët e Partisë Demokratike të Kosovës, Vlora Çitaku, ka deklaruar se zgjedhjet e reja parlamentare mund të mbahen në fund të vitit 2025.
Ajo theksoi se kjo është pasojë e krizës aktuale politike që ka mbërthyer vendin pas zgjedhjeve të fundit, të cilat u mbajtën para pothuajse tetë muajsh.
“Në momentin në të cilin jemi, konsideroj që zgjedhjet e reja parlamentare janë të pashmangshme […] Do të jetë teknikisht e pamundur që zgjedhjet e reja parlamentare të organizohen para përfundimit të balotazhit [për zgjedhjet lokale]. Zgjedhjet e reja parlamentare, natyrisht, në bazë të afateve kalendarike, mund të ndodhin kah fundi i vitit”, vlerësoi ajo në një intervistë për “Kosova Press” të publikuar të dielen.
Lëvizja Vetëvendosje e ka shpallur të përmbyllur procesin e konstituimit të Kuvendit të Kosovës pavarësisht dështimit për të zgjedhur nënkryetarin e pestë të organit të ri ligjvënës, i cili i takon komunitetit serb.
Megjithatë, kjo çështje ka shkuar në Gjykatën Kushtetuese, e cila ka vendosur masë të përkohshme përmes së cilës ua ndalon deputetëve të ndërmarrin veprime të mëtejshme, si dhe ua ndalon atyre zhvillimin e ndonjë procedure në funksion të formimit të qeverisë së re deri më 30 shtator.
Në këtë situatë të pazakontë, vendi ka mbetur mes një qeverie në detyrë e pa legjitimitet të plotë, dhe një qeverie të re që ende nuk ka marrë formë për shkak të mungesës së strukturës drejtuese të Kuvendit të Kosovës, duke rrezikuar që vendi të shkojë drejt zgjedhjeve të jashtëzakonshme, në një periudhë të trazuar gjeopolitike.
