Presidentja Vjosa Osmani dorëzon komentet e saj në Kushtetuese për çështjen e nënkryetarit të Kuvendit nga komuniteti serb
Presidentja Vjosa Osmani ka paraqitur para Gjykatës Kushtetuese qëndrimin e saj lidhur me sfidën e ngritur nga Lista Serbe në lidhje me pozitën e nënkryetarit të Kuvendit nga komuniteti serb.
Gjatë një konference për media, Osmani theksoi se funksionimi efektiv i Kuvendit përmes deputetëve është kyç për ruajtjen e rendit kushtetues. Ajo nënvizoi se bllokimi i Kuvendit për shkak të mosmarrëveshjeve mbi një nënkryetar është i papranueshëm, veçanërisht kur Kryesia ka kuorum.
“Bllokimi i Kuvendit për shkak të një nënkryetari dhe pavarësisht kuorumit në Kryesi, është një kërcënim serioz për funksionimin institucional,” tha Osmani.
Presidentja shtoi se Kosova respekton të drejtat e pakicave si askush tjetër në rajon, por theksoi se këto të drejta nuk mund të përdoren për të penguar punën e institucioneve.
“Po tenton që për një nënkryetar të bllokohet funksionimi i shtetit të Kosovës. Qëndrimi ynë është i qartë: përderisa Kryesia ka kuorum dhe Kuvendi ka zgjedhur nënkryetarë, Kuvendi nuk duhet të bllokohet,” shtoi ajo.
Osmani theksoi se qëllimi i Listës Serbe është pikërisht bllokimi i punës së Kuvendit.
