Shefja e Stafit të Presidentes së Kosovës, Learta Hollaj, ka hedhur poshtë deklaratat e Arbërie Nagavci, duke i cilësuar të pavërteta pretendimet se Vjosa Osmani ka marrë ofertë për nënshkrime nga Lëvizja Vetëvendosje për të rikandiduar për presidente. Në reagimin e saj, Hollaj theksoi se Presidentja Osmani nuk ka pranuar asnjë ofertë të tillë dhe e quajti deklaratën “gënjeshtër”.
Më herët, Nagavci kishte bërë të ditur se Vetëvendosje i kishte ofruar Osmanit 30 firmat e nevojshme për të hyrë në garën presidenciale, pak para përfundimit të afatit kushtetues për kandidaturat.
Ndërkohë, Osmani ka refuzuar të jetë pjesë e garës, ndërsa deri tani kandidat i konfirmuar mbetet ministri i Jashtëm Glauk Konjufca. Opozita, pavarësisht negociatave paraprake me Vetëvendosjen, ka refuzuar të përfshihet në proces pas propozimit të emrit të Konjufcës.
