Kryeministri në detyrë i Kosovës, Albin Kurti, ka deklaruar sot se Qeveria dhe Lëvizja Vetëvendosje gjithmonë kanë respektuar aktgjykimet e Gjykatës Kushtetuese, por ka lënë të kuptohet se vendimi i fundit për konstituimin e Kuvendit mund të sjellë sfida të reja politike.
Duke folur me tone më të ulura para gazetarëve, Kurti tha se ekzekutivi që ai drejton nuk ka anashkaluar asnjëherë aktgjykimet e Kushtetueses, ndërsa shtoi se edhe si kryetar i LVV-së ka vepruar gjithmonë në përputhje me vendimet e gjykatës më të lartë në vend.
“Nuk ka asnjë aktgjykim të Gjykatës Kushtetuese që Qeveria e Kosovës me mua si kryeministër nuk e ka respektuar. Dhe, nuk ka asnjë aktgjykim të Gjykatës Kushtetuese, të cilin edhe unë si kryetar i LVV-së, si subjekti më i madh në vend e Kuvend, nuk e kam respektuar. Por, kur më pyesin sërish a do ta respektoj aktgjykimin e Gjykatës Kushtetuese kjo më bën të mendoj që do të jetë pazakonshëm i padrejtë, i padurueshëm, saqë ndoshta duhet ta konsiderojmë se çfarë duhet të bëjmë,” – u shoreh Kurti.
Më 8 gusht, Gjykata Kushtetuese njoftoi se ka marrë aktgjykim lidhur me konstituimin e Kuvendit, por deri tani nuk e ka publikuar versionin e plotë. Sipas njoftimit, Kuvendi është i obliguar që brenda 30 ditësh të zgjedhë kryeparlamentarin përmes votimit të hapur, ndërsa i njëjti kandidat mund të vihet në votim jo më shumë se tri herë. Afati fillon të rrjedhë nga dita e publikimit të aktgjykimit të plotë.
Kurti e cilësoi këtë vonesë të pazakontë, duke kujtuar se më 26 qershor, në një rast tjetër, Kushtetuesja kishte publikuar në të njëjtën ditë edhe njoftimin, edhe aktgjykimin e plotë.
“Edhe një herë po e ritheksoj që ne gjithmonë i kemi respektuar aktgjykimet e Gjykatës Kushtetuese, por kësaj radhe, për dallim nga 26 qershori, e kemi vetëm njoftimin e Gjykatës Kushtetuese dhe po presim aktgjykimin e plotë. Kur ta lexojmë atë, do ta japim vlerësimin tonë meritor. Nuk është mirë që kemi këtë vonesë, dhe për bindjen time, ka mospërputhje mes këtij aktgjykimi dhe atij të 26 qershorit, të po kësaj përbërje të Gjykatës Kushtetuese,” – tha ai.
Vendimi i Kushtetueses është pritur me qëndrime të ndryshme në skenën politike. Lëvizja Vetëvendosje e ka cilësuar arbitrar vendimin, duke ngritur dyshime për drejtësinë e tij. Partia Demokratike e Kosovës (PDK) dhe Lidhja Demokratike e Kosovës (LDK) e kanë vlerësuar si fitore të rendit kushtetues dhe demokratik.
Aleanca për Ardhmërinë e Kosovës (AAK) e ka përshkruar si rrëzim të “diktatit politik”.
Publikimi i aktgjykimit të plotë nga Kushtetuesja pritet të qartësojë situatën dhe të përcaktojë hapat e ardhshëm për konstituimin e Kuvendit të ri, ndërkohë që skena politike mbetet e tensionuar dhe me gjasa për zhvillime të reja
