Presidentja e Kosovës, Vjosa Osmani, ka njoftuar sot se në përputhje me Kushtetutën, ka caktuar Albin Kurtin si mandatar për formimin e Qeverisë së re të Republikës së Kosovës. Osmani i ka uruar Kurtit suksese në udhëheqjen e qeverisë së re dhe punë në shërbim të qytetarëve të Kosovës.
“Sot, në përputhje me Kushtetutën e Kosovës, kam caktuar Kryeministrin Albin Kurti, mandatar për formimin e Qeverisë së Republikës së Kosovës.
I uroj suksese në udhëheqjen e Qeverisë së re dhe punë në shërbim të qytetarëve të Republikës së Kosovës.
Ju priftë e mbara!”-shkruan Osmani.
Ky mandatin vjen pasi Kuvendi i Kosovës u konstituua me 118 deputetë të pranishëm. Seanca u drejtua nga Avni Dehari dhe Fatma Tuci. Deputetët bënë betimin dhe nënshkruan deklaratat përkatëse.
Albulena Haxhiu u zgjodh kryetare e Kuvendit me 66 vota pro, 44 kundër dhe 8 abstenime. Kundër votuan LDK, PDK dhe Lista Serbe, ndërsa AAK abstenoi. Në fjalimin e saj, ajo theksoi nevojën për bashkëpunim dhe shërbim ndaj qytetarëve.
U zgjodhën edhe pesë nënkryetarë nga LVV, PDK, LDK, Lista Serbe dhe Grupi Multietnik, të konfirmuar me 104 vota pro. LDK deklaroi se nuk mbështet kandidatë pa marrëveshje politike paraprake.
