Grupi parlamentar i Partisë Demokratike akuzon mazhorancën socialiste, Kryeministrin Edi Rama dhe Gjykatën Kushtetuese për një strategji të koordinuar politike, që sipas tyre synon të bllokojë hetimet e SPAK-ut dhe të mbrojë Belinda Ballukun nga drejtësia.
Sipas reagimit të PD-së, zvarritja e çështjes Balluku si në Kuvend, ashtu edhe në Gjykatën Kushtetuese, nuk është e rastësishme, por pjesë e një operacioni të organizuar për të penguar veprimtarinë hetimore të SPAK-ut dhe për të garantuar mbrojtje politike për korrupsionin në nivelet më të larta të pushtetit.
Demokratët theksojnë se mazhoranca socialiste dhe Edi Rama kanë zgjedhur shtyrjen e vendimmarrjes si mekanizëm mbrojtës për Belinda Ballukun. Në të njëjtën linjë, sipas tyre, ka vepruar edhe Gjykata Kushtetuese, e cila ka shtyrë pa afat vendimin për të pandehurën Balluku.
Edhe Kuvendi, sipas PD-së, ka ndjekur të njëjtën logjikë duke shtyrë mbledhjen e Këshillit të Mandateve pa një arsye të ligjshme, me justifikimin se duhet pritur vendimi i Gjykatës Kushtetuese. Sipas opozitës, masa e re e sigurisë e kërkuar nga SPAK ndaj Ballukut nuk lidhet me çështjen e pezullimit nga detyra, ndaj ky arsyetim konsiderohet i pabazuar.
Partia Demokratike argumenton se shtyrjet nga Gjykata Kushtetuese dhe nga Kuvendi përbëjnë hallka të të njëjtit zinxhir mbrojtës, të komanduar politikisht nga Edi Rama. Ajo nënvizon se, për shkak të vendimit për pezullimin e aktit të GJKKO-së, Gjykata Kushtetuese ka detyrim ligjor ta trajtojë këtë çështje me përparësi dhe të marrë një vendim që, sipas PD-së, duhet të zhbllokojë punën e SPAK-ut.
Në përfundim, opozita paralajmëron se çdo vonesë e mëtejshme përbën, sipas saj, një shërbim të drejtpërdrejtë për Kryeministrin Edi Rama dhe për Belinda Ballukun, duke krijuar hapësirë për blerje kohe kundër drejtësisë, prishje të mundshme provash, intimidim dëshmitarësh dhe vijim të aferave korruptive me vlerë miliona euro.
