Kryesia e Partisë Socialiste ka zyrtarizuar pasditen e kësaj të marte gjashtë emrat e kandidatëve për kryetarë bashkish në zgjedhjet e ardhshme vendore, përfshirë Tiranën, Vlorën, Beratin, Matin, Cërrikun dhe Tepelenën.
Pas shpalljes së emrave, kanë nisur menjëherë edhe lëvizjet në radhët e mazhorancës, për shkak se dy nga kandidatët e konfirmuar janë aktualisht deputetë të Kuvendit të Shqipërisë.
Ndër emrat kryesorë është Ogerta Manastirliu, ish- ministre e Shëndetësisë dhe deputete e qarkut të Tiranës, e cila do të heqë dorë nga mandati i saj për të garuar në zgjedhjet për Bashkinë e Tiranës. Si rrjedhojë, vendin e saj në Parlament pritet ta zërë Blerina Gjylameti, e cila ka qenë më parë deputete në disa legjislatura dhe arriti të grumbullonte 6,167 vota preferenciale. Në garën e brendshme për zgjedhjet parlamentare, Blerina Gjylameti ishte “kokë më kokë” me Olta Xhaçkën. Pas përfundimit të procesit të numërimit të votave, ajo iu drejtua Komisionit Qendror të Zgjedhjeve (KQZ) me një kërkesë për të vënë në dispozicion pamjet filmike të numërimit në të gjitha qendrat e votimit në Tiranë, për transparencë të plotë mbi rezultatin.
Ndërkohë, një tjetër ndryshim në radhët e Partisë Socialiste pritet të ndodhë në Qarkun e Vlorës, ku deputetja Brunilda Mersini është zyrtarizuar si kandidate për Bashkinë e Vlorës. Me kandidimin e saj, mandati i deputetes do t’i kalojë Briseida Çakërrit, e cila renditet pas Mersinit në listën shumëemërore të PS-së për qarkun e Vlorës.
Sipas të dhënave zyrtare të Komisionit Qendror të Zgjedhjeve, pas Mersinit qëndron Klevis Kaso me 5,288 vota preferenciale, mirëpo për shkak të rregullave të kuotës gjinore, mandati nuk mund t’i kalojë atij, por gruas më të votuar që vjen pas tij në listë – pra Briseida Çakërrit, e cila ka marrë 2,998 vota preferenciale.
