Ditën e nesërme pritet të zgjidhet drejtuesi i ri i SPAK, ndërsa ambasadat kryesore në Tiranë u kanë bërë thirrje anëtarëve të Këshillit të Lartë të Prokurorisë që procesi të zhvillohet me transparencë dhe standarde të larta përgjegjësie.
Një zyrtar i Ambasadës së SHBA-së, i pyetur nga gazetarja Klodiana Lala, theksoi rëndësinë e pavarësisë së institucionit.
“SPAK mbetet një partner i çmuar i Shteteve të Bashkuara në luftën kundër krimit ndërkombëtar,” deklaroi zyrtari amerikan, duke nënvizuar se pavarësia dhe funksionimi i pandikuar i Prokurorisë së Posaçme janë vendimtare për sigurinë e qytetarëve.
Edhe Bashkimi Evropian reagoi përmes një postimi në rrjetet sociale, duke ndarë pjesë nga fjala e ambasadorit Silvio Gonzato në takimin e përbashkët mes KLGJ-së dhe KLP-së. Në deklaratë, BE shprehu pritshmëritë për përgjegjësi maksimale nga anëtarët e KLP-së në prag të votimit.
“Anëtarët e KLP-së do të demonstrojnë nivelin më të lartë të përgjegjësisë dhe do të sigurojnë që Zyra e Prokurorisë Speciale të drejtohet nga një person me integritet, pavarësi, kompetencë dhe përkushtim të padyshimtë ndaj standardeve më të mira të BE-së”, thuhet në reagimin e ambasadës së BE-së.
Në të njëjtën linjë qëndrimesh ka dalë edhe Ambasada Britanike në Tiranë, e cila theksoi rëndësinë e procesit të drejtë dhe transparent.
“Zgjedhja e Drejtuesit të SPAK është një hap i rëndësishëm në përparimin e Shqipërisë për forcimin e shtetit të së drejtës dhe luftën kundër korrupsionit. Është e rëndësishme që Këshilli i Lartë i Prokurorisë ta realizojë këtë proces në mënyrë të lirë, të drejtë dhe transparente. Mbretëria e Bashkuar pret me padurim të bashkëpunojë me këdo që do të zgjidhet, për të vazhduar dhe forcuar marrëdhënien tonë të shkëlqyer”, shkruan ambasada.
Seanca plenare për intervistimin dhe votimin e kandidatëve do të mbahet të enjten në orën 09:00, ku pritet një pjesëmarrje e gjerë diplomatike, me përfaqësues nga SHBA, Gjermania, Britania e Madhe, Franca dhe Italia.
Katër kandidatët që do t’i nënshtrohen seancës dëgjimore janë:
Adnan Xholi
Doloreza Musabelliu
Elvin Gokaj
Klodian Braho
Sipas KLP-së, intervistat do të zhvillohen në rend alfabetik, ku secili kandidat do të ketë në dispozicion 45 minuta. Procesi do të transmetohet drejtpërdrejt nga RTSH. Gazetarët do të jenë të pranishëm në sallë, ndërsa kameramanëve do t’u lejohet të filmojnë vetëm pamjet hyrëse para fillimit të seancës.
