Deputetja e PS-së për qarkun e Korçës, Romina Kuko, është deri më tani i vetmi zë nga mazhoranca që ka reaguar publikisht për bllokimin e rrugës Librazhd–Përrenjas, një nga arteriet kryesore që lidh juglindjen me Tiranën.
Në një reagim në Facebook, Kuko e cilëson situatën “të papranueshme” dhe thekson se bllokimi ka cenuar drejtpërdrejt jetën e përditshme të qytetarëve, lëvizjen e lirë dhe sigurinë rrugore. Ajo shprehet në mbështetje të hetimeve të nisura nga Prokuroria, duke kërkuar që procesi të zhvillohet me shpejtësi, paanësi dhe transparencë të plotë.
Sipas saj, zbardhja e plotë e shkaqeve dhe përcaktimi i përgjegjësive është detyrim ndaj qytetarëve, ndërsa ligji duhet të veprojë njësoj për të gjithë. Deputetja nënvizon gjithashtu se institucionet kanë detyrimin të japin zgjidhje të menjëhershme dhe të rikthejnë normalitetin, ndërsa autoritetet po punojnë për lehtësimin e situatës.
