Kryetari i Partisë “Mundësia”, Agron Shehaj, ka ndryshuar qëndrim lidhur me kandidatin për bashkinë e Tiranës. Pas përpjekjeve për të imponuar një emër të propozuar nga forca e tij politike, Shehaj në fund ka pranuar të mbështesë kandidatin e propozuar nga Sali Berisha, aktorin Florian Binaj.
“Ne do ta mbështesim kandidatin jo politik dhe do të mbështesim Florian Binajn sikur ta kishim propozuar vetë. Mbështetja për të do të jetë në çdo formë që ai e konsideron të arsyeshme dhe të nevojshme,” deklaroi Shehaj.
Ky qëndrim i ri vjen vetëm një ditë pasi kreu i “Mundësia” kritikoi Partinë Demokratike, duke theksuar se nuk ishte konsultuar për emrin e shpallur dhe për këtë arsye nuk do ta mbështeste Binajn. Por duket se presioni politik dhe mungesa e alternativave e kanë detyruar Shehajn të gëlltis atë që tha një nate më parë.
I vendosur përballë zgjedhjes mes daljes me kandidat më vete apo tërheqjes nga gara, Shehaj zgjodhi të pranojë propozimin e Berishës për të shmangur një kosto politike që mund të rëndonte mbi të dhe partinë e tij modeste.
Megjithatë, kjo lëvizje duket se i ka dhënë një mësim të rëndësishëm politik. E para, në politikë lëvizjet duhet të jenë të menduara deri në fund që mos të dalësh bllof. Dhe e dyta, negociatat me Sali Berishën nuk funksionojnë me kushte, ose je pjesë e vendimeve të tij, ose dil si kundërshtar dhe sfidoje.
