Në zgjedhjet e ardhshme lokale që priten të mbahen në pranverë, të drejtën e votës e kanë edhe rreth 5000 persona që ndodhen në burgim apo paraburgim.
Ata kanë votuar historikisht në “paqe”, deri në vitin 2023, kur fitorja e PS-së për Bashkinë e Rrogozhinës, u përcaktua nga vota e të burgosurve.
Në atë kohë, PD u ankua dhe Kolegji Zgjedhor i anuloi zgjedhjet, pasi ata që kishin përcaktuar fitoren e PS, në fakt nuk ishin banorë të asaj bashkie, por votues të bashkive të tjera që ishin në Rrogozhinë vetëm se aty ndodhej burgu.
Asokohe, Kolegji Zgjedhor u shpreh se qelia është vendqëndrim, dhe jo vendbanim. Pra, për atë bashki mund të votonin vetëm banorët e saj, dhe jo të burgosur të ardhur nga qytete të tjera.
Tashmë që zgjedhjet po afrojnë, ky debat është aktivizuar përsëri.
Në KQZ, Komisioni Rregullator do të mblidhet dot për të miratuar projekt-vendimin “Për miratimin e rregullave për krijimin e qendrave të posaçme të votimit, hartimin e listës së zgjedhësve dhe krijimin e Komisionit të Qendrës së Votimit për zgjedhjet për organet e vetëqeverisjes vendore”.
Siç ka mësuar VNA, PD, përmes një email-i ka njoftuar kundërshtinë e plotë për aktin, dhe votimi do të dështojë, pasi që të miratohet duhet edhe një votë nga anëtarët e PD në rregullator.
“Shprehim kundërshtimin tonë ndaj thelbit të rregullimeve të propozuara.
Vendimi i Kolegjit Zgjedhor për çështjen e zgjedhjeve në Rrogozhinë ka përcaktuar shprehimisht se institucionet e vuajtjes së dënimit nuk mund të konsiderohen vendbanim për efekte zgjedhore, por vetëm vendqëndrim. Për rrjedhojë, çdo përpjekje për të krijuar një interpretim të ndryshëm apo interpretim “pajtues” përmes akteve nënligjore të KQZ, mund të përbëjë tejkalim të kompetencave dhe ndërhyrje në kompetencat e gjyqësorit.
KQZ nuk ka tagrin të interpretojë, modifikojë apo riformulojë vendime gjyqësore përmes akteve të saj. Vendimet e Kolegjit Zgjedhor janë përfundimtare dhe detyruese për zbatim,”-thuhet në emailin që PD i ka dërguar Komisionit Rregullator, përmes përfaqësuesit Franc Nuri.
Bllokimi i kësaj vendimmarrjeje në KQZ, përmes emrave të PD (Helga Vukaj, Arben Ristani), do të dërgohet në Kolegjin Zgjedhor.
Ngelet për tu parë, nëse Kolegji do i qëndrojë vendimmarrjes së vitit 2023, apo do të vendosë ndryshe, tani që PS ka ndryshuar në parlament edhe ligjin për “gjendjen civile”, i cili saktëson se qela e të burgosurit, është vendbanimi i tij dhe mund të votojë aty ku ka burgun.
