Është publikuar lista e plotë e kandidatëve për postin e Avokatit të Popullit, të cilët kanë dorëzuar firmat në Kuvend dhe pritet të kalojnë në seancë plenare për votim. Afati i dorëzimit të kandidaturave ka përfunduar sot.
Lista e kandidatëve është si vijon:
• Aranita Brahaj
• Besim Ndregjonaj
• Jola Hysaj
• Tartar Bazaj
• Adriana Kalaja
• Endri Shabani
Partia Socialiste ka bërë të ditur se do të respektojë traditën parlamentare dhe nuk do të vendosë kushte për votat, duke mbështetur kandidaturat e propozuara nga opozita.
“Kryesisht, ne nuk do të mbështesim një kandidat, por do të vlerësojmë kandidaturat që janë mbështetur me firma nga ana e opozitës”, deklaroi kreu i grupit parlamentar të PS-së, Taulant Balla.
Formula e zgjedhjes së Avokatit të Popullit
Sipas procedurës së dakordësuar, opozita propozon deri në gjashtë kandidatë nga lista e aplikantëve, ndërsa shumica zgjedh tre prej tyre që i konsideron të pranueshëm.
Nga këta tre kandidatë, opozita përcakton më pas emrin që do t’i paraqitet seancës plenare për votim me konsensus.
Kuvendi pritet të caktojë në ditët në vijim kalendarin e seancës ku do të shqyrtohet dhe votohet kandidati për Avokatin e Popullit.
