Ermal Nufi është zyrtarisht “kapiteni” i ri i socialistëve në Lezhë dhe është prezantuar sonte me strukturat atje. I sapozbritur në bazë pas marrjes së portofolit të Ministrit të Mbrojtjes, Nufi është shfaqur krah Ulsi Manjës për t’i marrë stafetën, duke u betuar për “dyfish përgjegjësi” dhe “angazhim në çdo qelizë”.
Në daljen e tij të parë, Nufi nuk i kurseu elozhet për “shokun e mikun” Manja, por mes rreshtave kuptohet se në Lezhë nuk ka ardhur thjesht një emër i ri, por një zgjatim i pushtetit të vërtetë të Ballukut, teksa Manja rikthehet në Dibër.
Nëse dikush ka dyshime për fatin e tij, mjafton të shohë trajektoren: nga zyrat e kabinetit të Belinda Ballukut, Nufi u katapultua me shpejtësi marramendëse si mëkëmbës i saj në Ministrinë e Mbrojtjes sapo ajo u largua nga qeveria. Tani, me bekimin e Ramës, ai merr frenat e një qarku të vështirë, duke konfirmuar se “Ylli i Belindës” nuk ndriçon vetëm në dikasteret e Tiranës, por po shtrin influencën kudo ku pushteti ka nevojë për besnikëri të certifikuar.
Lezha, nga sot, është zyrtarisht nën “mbrojtje” të re.
Njëjtë edhe në Shkodër, një tjetër Beniamin i Ballukut, Enea Karakaçi u prezantua si drejtues i ri politik i qarkut.
