Një ngjarje e rëndë është raportuar në Leposaviç, ku Policia e Kosovës akuzon xhandarmërinë serbe për shkelje të kufirit, duke plagosur dhe rrëmbyer një qytetar me inicialet M.V., shtetas i Kosovës me kombësi serbe.
Sipas Policisë, “vendi i ngjarjes dyshohet të gjendet brenda territorit të Republikës së Kosovës, në afërsi të zonës së Leposaviqit, në atë që njihet si pika zero (0), ndërmjet Kosovës dhe Serbisë. Për këtë rast, Policia e Kosovës ka informuar dhe bashkëpunuar me KFOR-in, përgjegjës për zonën kufitare.”
Autoritetet kanë ndërmarrë veprimet hetimore duke intervistuar dëshmitarë, të cilët raportuan se disa persona të maskuar hynë në territorin kosovar, plagosën dhe rrëmbyen viktimën, për ta dërguar më pas në Serbi. Sipas dëshmitarëve, ai u transportua me autoambulancë drejt qytetit të Nishit.
Ngjarja ngjason me rrëmbimin e tre policëve kosovarë nga xhandarmëria serbe disa kohë më parë, të cilët u liruan vetëm pas ndërhyrjes së komunitetit ndërkombëtar.
