Deputeti i PS, Vullnet Sinaj, thotë se minatorët dhe balerinët kanë të njëjtat vështirësi në punën e tyre.
Gjatë diskutimeve në Komisionin për Burimet Natyrore, Infrastrukturën dhe Zhvillimin e Qëndrueshëm për “Statusin e Minatorit”, Sinaj tha se nuk mund të miratohet, pasi sipas tij, në këtë frymë mund të kërkojnë status të veçantë edhe balerinët pasi edhe ata kanë punë të vështirë.
“Që mos të kemi statuse të veçanta për secilin sektor, se mund të ngrihet nesër edhe këta të baletit të kërkojnë edhe këta status për punën e tyre, se edhe ata vështirësi kanë atje, lodhen dhe ata. Ne kemi bërë një ligj të përgjithshëm për këtë gjë dhe nga 2019-ta deri më sot ne jemi dhe dy herë të tjera në pushtet, do të thotë që e kemi zgjidhur në atë mënyrë që e kanë pranuar ligjin dhe minatorët dhe naftëtarët të gjithë së bashku”, u shpreh deputeti i PS.
Në fakt krahasimi dhe ironia është sa i shpifur aq edhe i ulët, pasi vetëm një deputet biznesmen si Vullnet Sinaj mund të bëjë një krahasim mes punës së minatorit me atë të balerinit. Çdo profesion ka vështirësitë e veta siç është dhe baleti, por ta krahasosh me atë të minatorit i cili futet “shtatë pash nën tokë”, me shpresën se do të dalë i gjallë, është një hipokrizi banale.
Natyrisht që deputeti Sinaj nuk do ta kuptojë kurrë se çfarë do të thotë të futesh me kilometra nën tokë për një rrogë që në fund të muajit nuk përballon dot çmimet në marketet e tij. Të paktën të na i kursejë këto krahasimet banale, sepse ka plotë mënyra se si të mbrojë interesat e kolegëve të tij biznesmenë që pasurohen në kurriz të minatorëve pa u plotësuar as kushtet minimale në punë.
