Ndërsa Kosova shpall mbështetje financiare për studentët në prag të vitit të ri akademik, në Shqipëri studentët vazhdojnë të përballen me mungesë ndihme, konvikte që ndahen “me mik”.
Qeveria në detyrë e Kosovës ka vendosur të japë nga 100 euro për çdo student në fillim të vitit akademik, si ndihmë për përballimin e shpenzimeve të studimeve. Lajmi u bë i ditur nga kryeministri në detyrë, Albin Kurti, gjatë mbledhjes së kabinetit qeveritar.
“Me rastin e fillimit të vitit akademik, sot do të miratojmë vendimin për ndarjen e shumës prej 100 eurosh për të gjithë studentët që i plotësojnë kriteret. Kjo është një mbështetje e menjëhershme për ta dhe familjet e tyre”, tha Kurti, duke paralajmëruar edhe mbështetje për studentët të cilët studiojnë në qytete të tjera nga ai i vendbanimit.
Ndërkohë në Shqipëri, një ndihmë e tillë as nuk e çon nëpër mend. I vetmi ‘lehtësim’ për studentët në Tiranë është aboneja falas, e cila shpeshherë nuk ka as vlerë praktike për shkak të kaosit në transportin urban.
Për më tepër, së fundmi ka pasur edhe tensione mes studentëve dhe autoriteteve për mënyrën e ndarjes së dhomave në Qytetin Studenti, ku sipas akuzave të studentëve, përfitimi i konvikteve është i lidhur ngushtë me njohjet dhe ndërhyrjet.
Në një kohë kur kostoja e jetesës për një student në Shqipëri është ndjeshëm më e lartë se në Kosovë, reagimi i autoriteteve shqiptare duket minimal, në mos inekzistent.
