Vendimi i Gjykatës Kushtetuese nuk e ka ndalur Ogerta Manastirliun të vijojë turin e takimeve në Tiranë, të cilat ngjajnë si vazhdim i fushatës zgjedhore për bashkinë e kryeqytetit. Edhe pse procesi për zgjedhjet e pjesshme të 9 nëntorit u pezullua pas vendimit në favor të Erion Veliajt dhe ende nuk ka një datë të re, deputetja socialiste po intensifikon takimet me banorë të Tiranës, duke përfituar edhe nga apatia e opozitës pas vendimit të GJK.
Në disa raste, Manastirliu shfaqet sikur ka marrë rolin e kryebashkiakes së Tiranës pa u votuar ende, pasi prezantohet në çdo zonë të kryeqytetit për të folur mbi buxhetin e vitit 2026 dhe investimet e planifikuara. Takimet e saj shpesh mbajnë natyrë të qartë fushate, si ai i fundit në një punishte tradicionale të poçarëve në Farkë, ku promovoi një zanat të vjetër tiranas në zhdukje.
Postimet e Manastirliut publikohen rregullisht edhe në profilin e kryeministrit Edi Rama, çka forcon idenë se ish-ministrja po zhvillon fushatë të strukturuar e jo thjesht takime rutinë. Në të kundërt, edhe deputetë të tjerë socialistë do të ishin të pranishëm në komunikimet e tij publike.
Ndërkohë duhet theksuar se, pavarësisht skandaleve korruptive që shpërthejnë çdo ditë, Edi Rama vijon organizimin e strukturave të tij për t’i mbajtur gati për çdo proces zgjedhor. Në anën tjetër, opozita vazhdon të çorganizohet me “Foltoret” për të justifikuar humbjen e radhës me refrenin e zakonshëm “na i kanë vjedhur zgjedhjet”.
