Kryeministri Edi Rama duket se nuk ka ndërmend të marrë në konsideratë kërkesën e fermerëve për rikthimin e naftës pa akcizë për bujqësinë. Në takimin me prodhues dhe sipërmarrës të përpunimit të vajit të ullirit në Berat, ai deklaroi se fermerët nuk do të përfitojnë më nga kjo skemë, duke argumentuar se është keqpërdorur.
“Disa persona që punojnë tokat e të tjerëve kanë marrë naftën dhe ia kanë kaluar të tretëve, sepse skema është ndërtuar mbi sipërfaqe toke që shpesh nuk përputhen me përdoruesit realë. Ka pasur raste kur përfituesi real nuk është ai që e punon tokën, dhe kjo ka sjellë deformime të skemës. Për këtë arsye, kjo formulë nuk ka funksionuar dhe as nuk do të funksionojë,” u shpreh Rama.
Me këtë deklaratë, kreu i qeverisë u jep përgjigje negative fermerëve, të cilët pak ditë më parë protestuan para Ministrisë së Bujqësisë. Një nga kërkesat kryesore të tyre ishte rikthimi i subvencionit të naftës, në një kohë kur çmimet e karburanteve vazhdojnë të rriten.
Megjithatë, në këtë argumentim lind një paradoks i dukshëm. Nëse, sipas logjikës së kryeministrit, fermeri mund të abuzojë duke ia kaluar naftën dikujt tjetër, atëherë pse i njëjti standard nuk aplikohet edhe për naftën e jahteve? Kujtojmë se që prej vitit 2022, jahtet që furnizohen me naftë në portet shqiptare nuk paguajnë akcizë, TVSH apo tarifa të tjera, përveç një tarife simbolike prej 40 lekësh.
Nëse ndiqet e njëjta logjikë, edhe pronarët e jahteve mund të abuzojnë duke furnizuar “mercedezat” e tyre — që “mercedezat” i kanë koleksion në shtëpi.
Pra, sipas këtij arsyetimi, fermeri që punon tokën mund të dyshohet për abuzim, ndërsa ai që, përveç “mercedezave”, ka luksin të ketë edhe jaht, e merr naftën pa taksa dhe pa dyshime për abuzim.
Të qeshësh apo të qash me këtë situatë?
