Zëvendëskryeministrja, Belinda Balluku ka bërë një lëvizje që u kujton kosovarëve një “dhuratë” tjetër nga qeveria e Edi Ramës, taksën famëkeqe në Rrugën e Kombit. Në një postim në rrjetet sociale, ajo njofton se, si për ironi, do ta heqë këtë taksë vetëm për një ditë, më 17 tetor, ditën kur në Tiranë zhvillohet protesta për komandantët e UÇK-së.
“Rruga e Kombit pa pagesë më 17 Tetor! ‘Liria ka emër, Drejtësi për çlirimtarët’,” shkruan Balluku, duke ftuar të gjithë të bashkohen në Tiranë për “drejtësi, dinjitet dhe të vërtetën” e luftës çlirimtare të Kosovës.
Por efekti i këtij “gjenialiteti simbolik” është krejt tjetër. Në vend që të bëjë një ndryshim real, ajo vetëm u rikujton mijëra qytetarëve të Kosovës se ishte qeveria e Edi Ramës ajo që ua vendosi këtë taksë, pavarësisht se rruga është një investim shtetëror i financuar me taksat e shqiptarëve.
Ky “veprim madhor” tregon më shumë se fjalët sa hipokrite është qasja e qeverisë ndaj Kosovës, një marrëdhënie ku Kosova duket se shërben vetëm si një mjet në shërbim të patriotizmit bajat politik.
