Kryebashkiaku i Tiranës, Erion Veliaj, i cili ndodhet në paraburgim që prej datës 10 shkurt të këtij viti, ka urdhëruar nisjen e përgatitjeve për dekorimin e kryeqytetit me rastin e festave të fundvitit.
Në një njoftim zyrtar të Bashkisë së Tiranës thuhet se Veliaj ka kërkuar që Ndërmarrja e Dekorit dhe Eventeve të fillojë menjëherë punën për vendosjen e ndriçimeve dhe zbukurimeve festive në sheshe, rrugë dhe hapësira publike.
“Tirana do të ndriçojë sërish për festat e fundvitit. Edhe pse ndodhet në kushte të vështira, kryebashkiaku ka urdhëruar nisjen e përgatitjeve, duke kërkuar respektimin e standardeve më të larta të sigurisë dhe kritereve teknike e estetike,” thuhet në njoftim.
Po ashtu, bashkia bën me dije se, bazuar në vendimin nr. 420, datë 08.06.2006 të Këshillit të Ministrave “Për miratimin e ceremonialit shtetëror të Republikës së Shqipërisë”, do të merren masa edhe për dekorimin e godinave të ministrive sipas kërkesave institucionale.
Ky është një prej akteve të para publike administrative që kryebashkiaku ndërmerr nga qelia e paraburgimit, duke sinjalizuar vijimin e ushtrimit të disa kompetencave për menaxhimin e çështjeve të qytetit.
