Kryetari i Bashkisë së Tiranës, Erion Veliaj, i është drejtuar Gjykatës Administrative me një kërkesë zyrtare që seancat gjyqësore të transmetohen live.
Në kërkesën e tij, Veliaj argumenton se transparenca e gjykimit duhet të garantohet realisht për publikun dhe jo të mbetet vetëm formale. Sipas tij, kufizimi aktual që lejon vetëm ndjekjen fizike të seancave nuk përmbush standardin e transparencës që kërkon ligji.
Si shembull ai sjell praktikën e Gjykatës Kushtetuese të Shqipërisë, e cila prej kohësh transmeton live seancat publike, duke garantuar akses më të gjerë të qytetarëve në proceset gjyqësore. Veliaj thekson se kjo praktikë duhet të shërbejë si model edhe për gjykatat e tjera, pasi transmetimi i drejtpërdrejtë është plotësisht i pajtueshëm me solemnitetin dhe zhvillimin normal të një procesi gjyqësor.
Sipas tij, një transparencë e tillë është edhe një detyrim ndaj publikut dhe ndaj qytetarëve që e kanë votuar tri herë radhazi, për të mësuar në kohë reale çdo fakt dhe të vërtetë rreth tij.
