Sekretari i Përgjithshëm i PD, Flamur Noka, ka dalë me një sqarim publik për largimin e dy këshilltarëve nga grupi i Partia Demokratike në Bashkinë e Durrësit, duke deklaruar se vendimi është marrë me kërkesë të degës lokale të partisë.
Në reagimin e tij, Noka thekson se “dy këshilltarët e grupit të PD në Bashkinë Durrës janë larguar nga grupi i këshilltarëve dhe strukturat e PD lokale me kërkesë të Degës së PD Durrës, e cila e kishte depozituar këtë kërkesë kohë më parë”.
Sipas tij, njëri prej tyre, Arlind Boshku, “është vërtetuar se ka punuar për Partinë Socialiste në zgjedhjet e 11 majit 2025”. Por në deklaratën e Nokës nuk renditet asnjë fakt konkret për këtë akuzë. Thjesht zoti Noka e ka vërtetuar siç di ai.
Këshilltari tjetër, Dritan Burgija, sipas Nokës, “ka shfrytëzuar pozicionin e këshilltarit të PD për përfitime personale nga Bashkia dhe, sipas relacionit të Degës së PD Durrës, ka punuar për PS”.
Por këtu lind një pyetje e thjeshtë: mos ndoshta zoti Noka nuk e di se përfitimet personale në politikë janë një fenomen jo kaq i panjohur për Partinë Demokratike?
Mjafton të shohësh bizneset e deputetëve apo familjarëve të tyre për të kuptuar se këto vite nuk kanë qenë edhe aq të vështira në “regjimin” e Edi Rama. Lejet e ndërtimit të familjes Sali Berisha apo të ndonjë deputeteje anglishtfolëse janë një kujtesë e mjaftueshme se biznesi (sidomos ai ndërtimit) nuk ka qenë edhe aq në hall.
Por duket se ka një rregull të pashkruar: përfitimet nuk janë problem kur mbeten në duart e kryesisë së madhe. Problemi lind vetëm kur ndonjë demokrat i thjeshtë tenton të përfitojë diçka nga pushteti lokal. Në atë moment ai shpallet menjëherë armik i brendshëm.
