Presidenti i Shteteve të Bashkuara, Donald Trump, deklaroi se Shqipëria dhe Kosova kanë premtuar angazhimin e trupave ushtarake në Rripin e Gazës, në kuadër të një iniciative të re ndërkombëtare të quajtur “Bordi i Paqes”.
Gjatë takimit të parë të këtij bordi, Trump bëri të ditur se, përveç Shqipërisë dhe Kosovës, edhe Kazakistani është shprehur i gatshëm të kontribuojë me trupa për stabilizimin e situatës në Gaza. Sipas tij, disa prej vendeve pjesëmarrëse kanë ofruar gjithashtu trajnime për forcat e policisë palestineze.
“Shqipëria, Kosova, Kazakistani – të gjitha kanë premtuar trupa për të stabilizuar Gazën. Kanë ofruar trajnime për forcat e policisë palestineze. Pa mendoni, kemi paqe në Lindjen e Mesme. Më parë nuk imagjinohej. Të gjithë kemi një vizion për t’i dhënë fund ekstremizmit dhe terrorit,” u shpreh presidenti amerikan.
Ai shtoi se Irani nuk mund të vazhdojë të kërcënojë stabilitetin e rajonit të Lindjes së Mesme, duke theksuar se “Bordi i Paqes” synon të sjellë më pak retorikë dhe më shumë veprim konkret në terren.
Trump bëri gjithashtu të ditur se Shtetet e Bashkuara do të kontribuojnë me 10 miliardë dollarë për këtë iniciativë, duke e cilësuar atë si një hap të rëndësishëm drejt stabilizimit afatgjatë të rajonit.
“Bordi i Paqes ka dëshmuar se zbaton zgjidhje. Ne kemi arritur të dalim me zgjidhje. Më pak fjalë dhe më shumë veprim. E ardhmja më e mirë mund të ndërtohet duke nisur nga këtu. SHBA do të japë kontribut prej 10 miliardë dollarësh për Bordin e Paqes,” deklaroi ai
